पुणे : शहरात टोळक्याकडून वाहनांची तोडफोड करण्याचे प्रकार वाढले आहेत. कोयते उगारून दहशत माजविली जात असल्याने नागरिकांमध्ये घबराट पसरली आहे. अशीच एक घटना सिंहगड रस्ता परीसरातून समोर आली आहे. सिंहगड रस्त्यावरील पानमळा परिसरात टोळक्याने दहशत माजविली. या टोळक्याने कोयते उगारुन टोळक्याने दुचाकी, रिक्षा, तसेच मोटारीच्या काचा फोडल्या.

या प्रकरणी पर्वती पोलीस ठाण्यात पाच ते सहा जणांविरुद्ध गुन्हा दाखल करण्यात आला आहे. आनंद शाहू चव्हाण (वय ३४, रा. शिवमल्हार सोसायटी. कोंढवा) यांनी याबाबत फिर्याद दिली आहे.

पोलिसांनी दिलेल्या माहितीनुसार, सिंहगड रस्त्यावरील पानमळा, दत्तवाडी, जनता वसाहत भागात मंगळवारी मध्यरात्री टोळके शिरले. टोळक्याने शिवीगाळ करून दहशत माजविली. तसेच कोयते उगारुन वाहनांच्या काचा फोडल्या. टोळक्याने रस्त्यावर लावलेल्या दुचाकी, मोटारी, तसेच रिक्षांची तोडफोड केली. दहशत माजवून टोळके पसार झाले.

दरम्यान, पसार झालेल्या आरोपींचा माग काढण्यात येत आहे. सहायक पोलीस निरीक्षक गंगाधर घावटे तपास करत आहेत.